Խաչվերաց

Որքան շատ են տոները մեր կյանքում, այնքան շատ համ ու երանգ են հաղորդում մեր առօրյայում:
Տավուշի միջնակարգ դպրոցի <<Լույս մանկանց>> ծրագրի սաների ելույթը նվիրված Խաչվերացի տոնին՝ դրա վառ ապացույցն էր: Միջոցառումը իրենց ներկայությամբ պատվել էին Տավուշի թեմի առաջնորդ Գերաշնորհ Տեր Բագրատ եպիսկոպոս Գալստանյանը, Բերդի տարածաշրջանի հոգևոր հովիվ Տեր Արամ քահանա Միրզոյանը, Սամվել սարկավագ Պողոսյանը, Վլադ Բալասյանը, Գագիկ Գրիգորյանը հյուրեր Կանադայից և այլոք:
Սաները ներկայացրին Խաչվերաց տոնի իմաստն ու խորհուրդը՝ այն համեմելով հոգևոր երգով ու ազգային պարերով:
Աստվածային օրհնություն ու շնորհ այս մանուկներին և նորանոր անակնկալներով լի միջոցառումներ:

         

Գիտելիքի օր

Սեպտեմբերի 1, գիտելիքի օր, տոնական տրամադրություն,  բազմերանգ ծաղկեփնջեր, հարազատ դարձած դեմքեր:
Տավուշի միջնակարգ դպրոցի բարեկարգ բակը բացօթյա մեղվափեթակ է հիշեցում՝ լցված բզզացող աշակերտների խայտաբղետ պարսով:
Ելույթ են ունենում սրտի թրթիռով  առաջին անգամ դպրոց ոտք դրած 1-ին դասարանցիները:
Հնչում են ողջույնի խոսքեր, երգ ու պար 12-րդ դասարանցիների կատարմամբ: Գովասանագրեր են հանձնվում ուսման առաջավորներին:
Ոգևորությունը վարակիչ է,  հույսերով լի, հանդիպումը՝ հաճելի:

    

Կանանց միջազգային օր

Սիրելի՛ մայրիկ, իմ լա՛վ, իմ բարի՛, գորովագութ ու ներողամիտ, ամենանուրբ հոգի, կյանքիս լուսավոր ժպիտ, բազմազբաղ ու նրբանկատ էակ:
Ես քեզ պաշտո՜ւմ եմ…
Մայրերին հղված ջերմագին խոսքերով սկսվեց Տավուշի միջնակարգ դպրոցի  սաների ելույթը:
Դահլիճում հնչում է <<Աշխարհի մայրեր>> երգը ու մասնակիցները միայն տղաներն են:
Գարնանային ջերմությունն ու բազմերանգ ծաղիկներ Ձեզ՝ սիրելի մայրեր:
Աստված չէր կարող լինել ամեն տեղ, դրա համար էլ ստեղծեց մորը: Իսկ Արարչի գլուխգործոցը մոր սիրտն է միշտ բաց ու երբեք չծերացող:
Փառաբանենք մեր մայրերին, կանանց ու քույրերին:

Արկղեր սահմանապահ զինծառայողներին

Հայ Առաքելական եկեղեցու Տավուշի թեմի Տավուշի միջնակարգ դպրոցի <<Լույս մանկանց>> ծրագրի կազմակերպիչները, սաներն  ու ծնողները հունվարի 28-ին  բանակի օրվա կապակցությամբ քաղցրավենիքով լի արկղեր ուղարկեցին սահմանապահ զինծառայողներին:

Շնորհավոր տոնդ հա՛յ զինվոր: Անսպառ եռանդ, ուժ ու կորով ենք մաղթում Ձեզ՝ մեր հայրենի հողի ու սահմանների անպարտ պահապաններ: Թող ձեր բազկի ուժից սարսափի թշնամին և Տերը պահի ու պահապան լինի բոլորիդ:

         

Սուրբ Ծնունդ

Քրիստոս Ծնաւ և Յայտնեցավ
Ձեզի Մեզի Մեծ Աւետիս:
Սուրբ ծննդյան տոնին էր նվիրված Տավուշի միջնակարգ դպրոցում կայացած միջոցառումը, որի մասնակիցներն էին Տավուշի դպրոցի <<Լույս մանկանց>> ծրագրի և Նավուրի ու Բերդի կիրակնօրյա դպրոցների սաները: Միջոցառումն իրենց ներկայությամբ պատվեցին Տավուշի թեմի հոգևոր առաջնորդ Տեր Բագրատ եպիսկոպոս Գալստանյանը և Բերդի տարածաշրջանի հոգևոր հովիվ Տեր Արամ քահանա Միրզոյանը:
Միջոցառման մեկնարկը Տավուշի դպրոցի աշակերտներինն էր, ովքեր հանգամանալից ներկայացրեցին տոնի իմաստն ու խորհուրդը: Հնչող շարականներն ու սուրբծննդյան բարեմաղթանքները խաղաղություն ու անդորր սփռեցին շուրջբոլորը: Իսկ երկնառաք սրտաբուխ աղոթքներն ու ցանկությունները Սուրբ ծննդյան տոներին իրականություն կդառնան:
Բացեք ձեր հոգիներն ու սրտերը և ընդունեք Հիսուսի ծննդյան ավետիսը: